如果移居物資有一張清單，清單上必然存在的，除了手提電話，相信就是電腦。

最初，他是街坊眼中的電腦達人。

人在異地，當電腦壞了，不知道應該找哪一間維修店舖，又要擔心敏感資料外洩，這是很多新移民的困難。

他，本業也與電腦相關，有電腦維修的技能，於是，他免費為街坊「診症」，報價材料費用，不收分文。在那種「香港人幫香港人」也很容易被懷疑有私心的氣氛下，免費服務也不容易，他會開始電腦維修服務，只因「將心比己」。

「其實我只係久病成醫，細個壞電腦，冇錢整，唯有自己研究，問吓同學。壞得多，整得多，睇得多，慢慢就識整。作為一個成日用電腦嘅人，壞電腦真係好慘㗎，何況喺新嘅國家？」

他在香港時，曾經擔任義務導師，教導青年人整電腦，讓青年人在社區協助長者維修電腦及安裝電腦。沒想到，帶着工作隻身來到英國，工餘時，又會重操故業。

後來，他的維修業務拓展了——開始協助街坊維修單車。他表示，在香港及英國照顧自用單車的文化相差很遠。在香港，除非本身興趣是單車，否則一般都會花錢找單車舖代勞；在英國，維修單車，可以說是每一個家庭的基本技能，也是很多父親傳承給兒子的知識及技術。

「其實同整電腦一樣，我都係自學。其實好多人都有需要，但係懶得學。不過，嚟到英國大家會學嘅最大動機係慳錢。」

他試辦單車維修工作坊，反應很好，也回應了自己助人自助嘅初心。

「不過，都會有街坊問，可唔可以俾錢等我幫手整。當然有錢收增加收入係會開心，但我更多嘅感受係覺得尷尬，如果我開始收錢，就搞到我好似開始其實好有機心、部署哂去搞活動、搵客咁。咁樣會影響我街坊之間嘅形象。」

後來，在英國，他愈來愈多電器壞。他先後處理過洗衣機、洗碗機、廁所、浴缸、花曬、抽油煙機、地板、地腳線、防漏水、油漆、安裝閉路電視、汽車鏡頭、換軚、換偈油等等大大小小工程。

「比起啲師傅，我當然唔係專業級，但我嚟到英國發現自己自學能力高，手工都唔錯。所以有啲街坊見我整完佢哋又搵我整。我講明唔係專業㗎，同埋我係要教識佢哋整，佢哋要同我一齊落手做，我先會幫手。如果成功整到，先收返少少車馬費。」

咁點樣決定邊啲服務收錢定唔收錢？

「首先要牌照嘅，例如電工、水喉嗰啲我唔會做，要尊重返人哋嘅專業。但係又想平民都可以學習到DIY知識，所以我強調搵我嘅人係要自己落手做，我只係陪佢一齊搵答案，同埋學習技能。我唔想得罪啲專業嘅師傅，阻人搵食就唔好，始終大家開展新生活都唔容易。」

咁你點睇「香港人幫香港人？」

「我正面㗎，香港人真係會比較了解香港人嘅需要，另外，香港人嘅手工，例如裝修嘅質素，真係比好多本地師傅好，做得比較細緻。不過，早幾年好多人用『香港人幫香港人』做口號，其實係搵食，就見到好多人討厭。因為啲界線唔清晰，令到部份街坊覺得有陰謀，特別係當年有好多收費唔係友情價不特止，仲收得貴一貴，大家個心就唔舒服。不過，我覺得『香港人香港人』本身係好事。你睇吓『印度人幫印度人』、『猶太人幫猶太人』，啲資金真係留返喺佢哋嘅社區同埋民族。其實香港人都得㗎，以前黃色經濟圈就係好例子。」

他在其他港人眼中算幸運的一群，帶着工作來英國，有收入，能做回本行。不少人眼中，能做到收支平衡已經很好了。他隻身來英，工作時間穩定，在工餘時瘋狂做義工，做義工令他擴闊生活圈子。

他笑說：「因為我份工本身冇意義呀嘛，我哋份工自己做自己，冇朋友㗎！」

談到意義，你的未來有甚麼打算？

「我打算做多少少本地義工，對於融入英國生活會更有幫助。另外，我想學整車！嚟咗英國，久病成醫嘅唔係電腦，而係部車，自己整，慳返好大筆錢，個滿足感超大，而家我報咗汽車維修課程，睇吓佢收唔收我！」

當他自學成功，讓我們期待他會與街坊分享汽車維修，以及更多與維修相關的自學成果。

作者：泰來

專欄介紹：

來英數年，我像麥泰來般走過不同地方，遇見許多香港人。每個故事都蘊藏韌性與希望，是否極泰來的見證，也開闊了我的眼界，給我力量。

現在，我將這些故事與你分享，或許生命真的有更多可能性。

（故事背景有一定程度修改，也得到當事人批准刊登。）