第一次碰上她，是在倫敦街頭。當時她在街上似乎迷路了，我便上前了解。與她談了一會兒，有點溝通不良，才發現她戴着助聽器，我才懂得遷就交談的位置及聲量。

我帶她到目的地。她算是一位婆婆了，走路的時候穩健地一步一步，十分小心，生怕自己會跌倒。當時正值疫情期，陪伴她走了數條街，感到她無論走路或是對於英國治安都有很多擔憂，而我望着他，心中也會有點擔心他在英國的生活。

我是後來才知道，她是非常勇敢的人。

原來她是一名長期病患者，患有罕有病，耳朵也失去了八成聽力，需要佩戴助聽器。她有一位更年老的丈夫，八十多歲了，而他們是這一波移英潮最早過來的一批，Visa一出，他們便申請了。

為甚麼會來英國呢？我坦白與她分享，代入其中，如果我有如此的身體狀況，伴侶年邁，即使香港狀況如此，也許我也會選擇留在香港，起碼，有熟悉的醫療制度。

「你講得啱，呢個亦都係好多病友嘅選擇。但係我想病友有多啲選擇。因為病而要留喺唔想留嘅地方，係一件好唔開心嘅事。長期病，已經令我哋好多嘢冇得揀。」

她的講法對我有點衝擊。

「我係做咗好多研究，帶住使命嚟英國——我想親身試吓英國嘅醫療制度。如果我試完覺得係OK，我就會推介俾好想離開，但係因為對醫療有好多擔心而留喺香港嘅一班病友。其實，呢類病友係好多。」

暫時體驗如何？

「好好，住落呢幾年，英國醫療好好。其他城市我唔知，喺倫敦OK。最多人擔心嘅語言問題，倫敦除咗可以預約翻譯，亦都有先進嘅翻譯服務。現場職員幫手喺個電話系統輸入需要廣東話變英文嘅翻譯，打個電話，嗰邊拎起電話嘅人已經係即刻用講廣東話幫手翻譯。」

翻譯以外，醫療質素如何？

「醫生整體係好好，就算用公立服務，覆診好仔細，可以見醫生嘅時間好長，可以問好多嘢。」

長期病配套方面呢？

「呢樣嘢我要好認真試，我打算試四年。因為我同病友講嘅嘢要負責任。如果我喺度生活四年覺得真係好，啲病友嘅信心都會比較大。配套好緊要，除咗醫療，社區配套係影響住生活質素。」

暫時你的生活如何？

「頭一年用咗好多時間適應生活、交通、天氣、學英文、搜集資訊。好彩有好多服務香港人嘅機構幫手，實在幫到好多手。香港人可以聚吓，又可以同啲本地人交流，又有社工問吓，學吓點樣融入英國。嗰陣班社工知道我嘅情況，仲搵醫生搞咗英國醫療服務簡介，我就可以對返究竟同我之前嘅資料係咪一樣。」

身為長期病患者，同時亦係老公嘅照顧者， OK嗎？

「佢話冇乜所謂，其實佢主要嚟英國係陪我。我哋隨時都最後階段啦，你見佢都唔係行得好，所以揀屋、揀區，做咗好多準備。嚟到簡單生活，佢就少啲出街。另外要諗養老同埋葬禮嘅問題，頭一兩年大部份香港人諗緊點樣適應新生活，比較少人諗死亡，好彩都有社工搞相關活動。我一早要諗定我或者佢身體差啲，有乜院舍服務，我哋突然喺屋企死咗，要打咩電話，喺屋企有張紙寫低咗。葬禮點搞，傾咗。平安紙遺囑，做哂。」

即係話，如果要死，你預咗會死喺英國嗎？

「我哋唔係後生仔，我哋係隨時冇命嘅老嘢，又有長期病。呢樣嘢出發前就要諗。葬我哋會葬喺英國，要搞返香港有排煩，又要使錢，簡單就得。喺邊度生活，嗰度就係屋企㗎啦。」

有冇說話想同香港人講？

「我哋人之將盡，冇咩求。後生嗰陣追求啲嘢都係虛幻。而家開心，順心，健康就得。我冇健康，都可以追求生活質素，大家有健康要好好珍惜。我唔係講緊身體，個人精唔精神，定係神經衰弱，呢啲都係健康。希望大家人生圓滿，少啲後悔嘅事。如果我喺英國生活做到大家嘅見證，希望可以俾啲病友多個選擇，我哋兩個咁樣都做到，大家更加冇問題啦。」

這篇文章刊出之時，他們在英國生活第五年了，祝他們順利，順心。

專欄介紹：

來英數年，我像麥泰來般走過不同地方，遇見許多香港人。每個故事都蘊藏韌性與希望，是否極泰來的見證，也開闊了我的眼界，給我力量。

現在，我將這些故事與你分享，或許生命真的有更多可能性。

（故事背景有一定程度修改，也得到當事人批准刊登。）