近日社交媒體流傳帖文，指香港懲教署要求在囚人士在寫信及探訪時段，呼籲親友在立法會選舉中投票。在囚者家屬阿D（化名）向《追光者》確認，的確有在囚人士在信中被要求加上宣傳對方去投票的語句。懲教署回覆本台查詢時譴責，相關指控是對署方的失實抹黑，雖然署方積極鼓勵在囚人士及其探訪者投票，但強調不會強迫任何人投票或宣傳投票。

上周末（15及16日）有至少兩個 Facebook 專頁發文，指有囚犯被要求在寫信及親友探訪時，呼籲外界在下月立法會換屆選舉中投票。阿D近期曾經前往監獄探望在囚親友，她向《追光者》指出，探訪室的桌上貼有立法會選舉的宣傳海報，「佢（囚犯）話啲職員已經開始要佢哋一定要投票，另外仲話有囚友寫信出去，都被要求加多句，叫收信嗰個投票」。

懲教署發言人回覆本台查詢，否認有關指控，並對有人在社交媒體發布針對懲教署及立法會換屆選舉的失實抹黑予以強烈譴責。發言人指署方積極鼓勵在囚人士及探訪者投票，但絕不會強迫任何人投票，或強迫任何人宣傳投票。

鍾翰林稱在囚時曾被帶往投票：懲教有更多「潛規則」控制囚犯

曾因煽動他人分裂國家罪、2020年至2023年在囚的香港獨立倡議委員會創辦人鍾翰林表示，他在2021年立法會選舉日被帶往投票：「懲教署職員去到我哋所在嘅囚室，通知係選民嘅在囚人士要去監獄體育館嘅臨時票站投票，但我哋係冇被告知可唔可以唔去、可唔可以唔投」。

鍾翰林解釋這是香港監獄文化的「潛規則」，署方根本毋須「強迫」任何囚犯做任何事：「其實懲教署暗掗底控制在囚人士做啲咩、唔做啲咩，更加會用呢啲手段，你唔做（服從），聽日咪搵人上來搜囚倉囉，上來睇下會唔會你個倉有其他人借畀你嘅書呀、其他人攝喺度嘅書籤嗰啲，只要搵到少少嘢就話要鎖你呀、加監呀，呢啲其實好慣常」。

釋囚：不意外　在囚者家屬：幫到市民啲人自然會投

近日各個政府部門及紀律部隊加強宣傳立法會選舉，鍾翰林認為懲教署未必單純是執行命令，「或者係自發嘅，甚或係懲教署個別唔同院所嘅高級職員有呢啲決定，要求在囚人士寫信、一定要去投票，呢啲其實唔會係啲好意外嘅事情，喺今日嘅香港」。

身處香港的阿D形容港府「出盡吃奶嘅力」宣傳投票，但作為選民未有因鋪天蓋地的宣傳而影響投票意願，「講真寫信呢啲係私人嘅嘢你冇理由去干涉……我覺得有啲悲哀，因為如果你個選舉係好嘅、有用嘅，幫到市民嘅，咁人哋自然會去投啦，你不如做好啲基本功，真係畀一個公平公正、改善到社會嘅選舉，就好過咁樣做呢啲表面功夫」。

資深議員批立壞先例　嘆「係咪要做到咁呢？」

港府為今屆立法會選舉催谷投票率可謂奇招盡出，曾任立法會議員多年的前民主黨主席李永達指，過往政府只會透過傳媒宣傳選舉資訊，讓選民自行決定投票與否，今屆做法會創下一個壞先例：「你咁做第時就會變咗北韓，百分之九十幾投票率，但成個世界都冇人信，因為係黨委書記、個黨嘅機構去叫人投票，我哋係咪要做到咁呢？」

2019年區議會選舉投票率高、民主派大勝，到2021年「完善選舉制度」投票率低迷。港府似乎特別着緊今屆的選舉宣傳，李永達分析，當局要向中央政府「交數」，「依家個問題最慘係澳門投票率唔太低，所以港府好有壓力，要向港澳辦也好、更上級也好，交代點解呢個特區做得咁差」。

儘管港府「用盡奶力」，李永達就斷言投票率「一定低」，因為市民已經對這個所謂的「選舉」失去信心，他更認為港府與其花幾億「做騷」，不如將這筆公帑花在弱勢社群身上。