他，出生貧窮家庭，沒有來自上一代的金錢人脈，憑自身努力考進大學，畢業後做了一份不錯的工作，後來發展自己的生意，他彷彿終於看見了脫貧的軌道。可是，他突然把生意結束，旁人均表示不解。他說那不是失敗，而是另一種計算——關於健康、平衡與幸福的方程式。

「我好清楚自己要乜。當時係覺得，永遠第一位：我要健康。做生意返工時間長，時間難管理，我病痛多咗好多，亦少咗娛樂同快樂。第二，嗰陣要同啲有錢佬打交道，我發現自己其實唔係好舒服，個人唔係好平衡。」

辭職後，他去了打工，在港式日本餐廳煮拉麵，慢慢感到自己快樂多了。

「夾到同事更表，我可以去做運動、打波、做Gym、學嘢，個人平衡返好多。」

收入少了，不要緊嗎？

「我物慾唔高，鍾意嘅興趣都好平，我哋又冇小朋友，同老婆都係易滿足嘅人，平時洗好少錢。」

他提到，在那餐廳認識了一位同樣崗位的兼職同事，正職竟然是醫生。

「佢話做醫生壓力好大，身邊啲同事好多都有啲病態，或者少年得志，性格有啲問題。佢話嗰面工作環境唔開心，成日話返嚟煮麵係減壓，唔駛用腦唔駛好多溝通。」

運動、打機、睇日本動畫漫畫，同老婆去小旅行，就是他的小天地，一個小康之家。香港多次巨變，他表示心知肚明，幸好有信任的兄弟可以分享心底話。可是，他一直沒有離開香港的打算。

「當時我覺得，我有樓，平供，有生活質素，生活上同陌生人唔講政治，一離開屋企低頭生活做另一個人，收工先做返自己，我OK。」

那為甚麼你會來了英國？

「醫療。大陸醫生、大陸藥，我唔得，我覺得搞到我底線。」

當時那個煮麵的醫生同事，與他分享了業界更多事情，令他開始思考、計算，是否要在香港終老，有沒有其他出路？

「我阿媽做過老人院，喺香港做老人家，其實都幾慘。」

於是他開始看那些移民KOL的YouTube頻道，加拿大、台灣、日本、澳洲……結果他來了英國。

「其實唔係話好理性選擇，有少少憑感覺，又計吓數，覺得呢度返咩工都差唔多錢，生活到就OK，啱我哋。最初係因為睇新聞話脫歐，大車司機（按：指重型車輛）高人工又吃香，我有大車車牌應該生活到咁，諗得勁簡單。」

當時香港樓市未跌，他以不錯的價錢賣出了香港的樓，然後隔空買了英國的一幢獨立屋。抵英後做過工廠，然後轉職郵差。

「郵差初初都幾好做，雖然要用啲力，但性質算簡單，啲同事又幾nice。但係一入冬，痴線！好辛苦！喺條街好凍好凍，做足預防措施都傷。仲有個問題，入咗行先知，去廁所好唔方便！好多時好難搵廁所，要草叢解決。怕去廁所飲少咗水，身體又差，個心就喺度計數，結果第二個冬天前辭職。」

然後他轉職，成為巴士司機。

「我幾鍾意學車揸車㗎，咩牌都有咁滯。呢面幾有用，剷車、貨櫃車、吊雞，我咩牌都有。但貨櫃車太長途，我唔想咁搏，亦唔駛要好多錢，我唔駛供樓，我要健康同Work Life Balance咋嘛，好清楚。」

可是，巴士司機並非想像中般易做。

「個Training勁難，一開波就要背好多條路線，又冇GPS，又會改路封路，唯有日日狂搭巴士拎筆記簿抄，考會考咁考。開工之後，雖然返4日放3日，但就要適應揸長時間，講緊每日大概10個鐘，不過日子有功練得到嘅。」

那是否可以做到退休？

「慣咗OK呀，放三日可以做好多嘢，人工亦都夠生活。初初都好多嘢要處理，有啲車又殘，部部車又唔同，又要處理啲麻煩乘客，星期五六市中心酒吧區嗰啲會搞事嘅醉酒佬就最麻煩。但係學吓學吓，慣咗，又學吓啲同事處理方法，就OK。同事都Nice，麻甩佬嘅愛。」

請問…咩係麻甩佬嘅愛？

「你有冇睇《Uber爸爸》（按：YouTube Channel《試當真》的劇場短片）？我就係嗰對父子囉。明明係錫對方，但把口就好衰，有時又唔識表達。即係如果我老婆俾人呃錢，我會話佢戇居，未必會戥佢慘或者氹佢。其實可能係肉痛佢，但係唔慣咁表達。」

咁你滿意現時生活嘛？有沒有想與香港人說的話？

「我簡單生活，健康開心就OK。香港人計數好叻，但希望大家都自己識計自己條數。無論你點計，總會有人話你蠢，話條數唔係咁計。唔駛理人，自己計得掂，開心就OK。」

作者：泰來

專欄介紹：

來英數年，我像麥泰來般走過不同地方，遇見許多香港人。每個故事都蘊藏韌性與希望，是否極泰來的見證，也開闊了我的眼界，給我力量。

現在，我將這些故事與你分享，或許生命真的有更多可能性。

（故事背景有一定程度修改，也得到當事人批准刊登。）