他是一個油漆師傅，五十多歲，當年BNO簽證計劃一出，他馬上申請，屬第一批以BNO簽證到達英國的人。

他很怕英文，形容自己屬極度草根香港仔，笑說自己最常講的英文只是在茶餐廳叫ABC餐。但努力半生也稍有積蓄，為了子女，便與太太及母親一家人來英，早前置業了，買了一間新建獨立屋。他做過貨倉，但覺得體力不能長期應付，在朋友介紹下重操故業——在一間港人裝修公司做油漆師傅。

「我覺得香港師傅啲手工真係世界級，雖然咁講有啲寸，但比起呢面，我哋真係超班㗎哈哈！始終我哋自己都有要求。」

他專項是油漆，慨歎未必人人懂欣賞，因為對於油漆，大部份本地人都自己DIY，也未必懂欣賞專業與非專業那細緻的分別。

「不過我嚟咗英國又明，自己屋企，慳等一蚊得一蚊！自己做又有成功感。」

話題轉至近日英國政府倡議收緊移民政策。他表示，自己仍然緊貼香港新聞，由於英文程度差，很少看本地新聞，只看網上媒體的翻譯新聞。最初知道移民政策收緊，是一位街坊知道他英文差，WhatsApp 關心他會否很擔心。

「講返好搞笑，我2021年係喺超級市場識佢，嗰陣冇咁多香港人，見到香港人好珍貴好珍惜，就會吹多幾句。我見佢想買臘腸，但企咗喺度好耐，可能覺得好貴，就同佢夾份買，第一次見就傾咗成個鐘，仲交換電話，而家久唔久都會聯絡吓。」

「佢問我擔唔擔心英文考試轉咗制度，我仲問：『吓，轉咗咩？』」

他生活在自己的小圈子，返工、返屋企，聽香港收音機開工，偶然睇吓離散傳媒報道嘅英國新聞。他形容自己生活上不太需要用英文。但新政策建議的要求，由B1提升至B2，大概由小學生日常會話程度提升至類似香港A Level程度，考試由10分鐘對答改為聽讀寫講。面對國會議員也表示沒信心合格的要求，他表示非常震驚，真的震，真的驚。

「留唔到喺英國？其實唔會話留唔到，不過要考到試先有定居同埋入籍。影響梗係大啦，福利啦，強積金啦，好多錢㗎嗰度。但係唔會返香港㗎喇，始終離開香港係有原因同埋初心。」

會有任何應對措施嗎？

「講嚟講去最驚都係英文，但係我有最強定心丸——連我阿媽都考咗B1，佢真係ABC都未識數㗎，但係佢而家分到超級市場啲菜名。其實香港人都幾犀利，考Life in UK，有好多人自己過咗關，都會整好多筆記同埋網站俾後人；教我阿媽英文嗰個都係一個香港婆婆，然後又有好多YouTube免費教英文，政府都有免費英文課程。B1如果我而家去考都一定唔達標，但係啲婆婆都考到，搞到我冇藉口。」

咁如果轉B2，你會點？

「轉B2就一定考唔到啦，等到退休年齡囉哈哈！我而家求神拜佛佢唔改，或者遲啲先改，咁我仲趕得切用B1。如果轉B2，等如要我讀返晒成個中學課程英文，冇乜希望喎。而家唯有叫啲朋友寫多啲諮詢，搵吓啲議員囉。但係無論如何，一家人都要搞掂咗個定居先，第一關。」

轉B2，你會唔會離開英國？

「我有啲街坊真係走咗呀，有人返咗香港，有人去其他國家。始終個個人唔同，要考慮嘅都唔同。我自己覺得喺度生活開心喎，錢雖然少咗，但係成家人都開心咗，同埋我唔想小朋友要離開佢嘅朋友同埋適應香港嘅教育制度。如果真係轉B2，要計數呀。我覺得我個情況會趕得切拎定居，咁樣生活都會容易啲。如果未入到籍，唯有擺住先啦……聽講有啲民族都係咁。係啲強積金……不過都唔到你諗。你咁樣講一講，我好似講到好亂。總之……我覺得，如果每個月條數打到和，收支平衡，就算入唔到籍，我都會留喺度。」

有冇啲乜嘢想同香港人講？

「雖然啲政策真係唔知會點，或者呢排大家都會好失望好嬲好驚，但係點都好，希望香港人一齊過渡，大家都一齊定居入籍哂就最好啦！大家移過民就明，大家生活都唔容易㗎！留喺香港一樣唔容易，大家加油啦！」

專欄介紹：

來英數年，我像麥泰來般走過不同地方，遇見許多香港人。每個故事都蘊藏韌性與希望，是否極泰來的見證，也開闊了我的眼界，給我力量。

現在，我將這些故事與你分享，或許生命真的有更多可能性。

（故事背景有一定程度修改，也得到當事人批准刊登。）