桃園樓（Garden of Peach Taiwan Ramen），呢個名喺英國曼徹斯特，對好多香港人同台灣人嚟講，係一個特別嘅存在。佢唔單止係一間台式美食文化據點，而係致力將台灣嘅地道風味帶到英國，畀到海外香港人除日本外另一返「鄉下」的味道。

還記得作者有幸獲邀出席開幕日，除咗海量美食，嗰日「醒狗代醒獅」一幕，沒有獅就用狗，活現香港人靈活變通之餘又不失傳統，作者到而家都記到清清楚楚，歷歷在目！好可惜，事隔 21 個月，今日要說「再見」！

扎實的文化推廣伙伴

桃園樓最特別嘅地方，係佢唔只提供美食，更係一個充滿活力的文化交流平台。

• 點菜：雖然唔少英國嘅中餐館、酒樓同外賣店都可以用廣東話點菜，但桃園樓就畀到作者一份由內而外嘅親切感。
• 文化表演：除咗食嘢，仲有香港文化表演，畀大家回味香港。
• 多元共融：佢哋仲會搞唔同族裔嘅文化活動——好似我哋港講廣其中一次 Happy Hour 就係借用桃園樓舉辦打麻雀活動 ，仲有新年嗰陣，曼城財神即席寫揮春！
• 藝術空間：牆上面的詩、畫、藝術創作，畀各位食客等緊出餐時可以遊走一轉畫廊。
• 交流聚會：呢度亦係唔少聚會的場地。記得有一次，大家就熱烈討論在英中文教育發展，席上除咗老闆，亦有有書店代表、澳洲中文教育工作者同香港教育界前輩，並促成本專欄。當然，大大小小嘅見面同聚會，佢都係最佳場所（連我哋港講廣嘅聚餐都係喺度食㗎！）。
• 傳承廣東話：甚至喺店內一個角落，放置中文漂書同徵書，亦係我哋港講廣其中一處實體收集童書嘅地點。

總括嚟講，桃園樓真係一個既有美食，亦致力向本地人同在英香港人分享、推介、宣揚甚至傳承廣東話同香港文化嘅好平台、好伙伴。喺度要借個位，向佢哋團隊致敬！

約定再見，就會再見

正如官方 Instagram 所提及：「花開花落，緣聚緣散」。我哋衷心但願下一句會係：「請君勿念，後會有期」同埋充滿希望嘅承諾：「約定再見，就會再見」。

後記：最後營業日為12月13日，請各位早啲去捧場！

作者：Global Kids 港講廣 www.globalkids.world

我哋嘅團隊由全球包括香港、英國、加拿大同澳洲教育界人士組成，致力用廣東話教授2歲以上嘅海外細蚊仔/細佬哥以及成年人士學中文，傳揚香港精神、中華文化與當地文化知識與對照。課程包括廣東話中文班、GCSE中文班及Cantonese for Beginners班。